Scoil: Inis Cléire, Dún na Séad

Ar an leathanach seo

1. Bean an Ghalair agus Iasacht Léine

   

   Roinn Roinn Postáil

   Bhí bean ann fadó go raibh aicíd uirthi agus ní raibh aon nídh a' deúnamh aon leigheas dí. Dubhrathas léi dul go dtí bean na beadh aon nídh ar saoghal ag deúnamh buartha dí ná aon trioblóid uirthi agus léine d'fháilt ar iasacht uaithi agus go leighisfeadh an léine í. Bhí san go maith agus bhí sí ag machtnamh dí féin cé hí go raghadh sí chúici chun an léine d'fháilt uaithi. Chuimhnig sí annsan ar bhean gur tuigeadh di dar léi, na raibh aon easnamh ná aon trioblóid sa tsaoghal uirthi, na aon nídh a' deúnamh aon bhuaidreamh dí.
   Chuaidh sí ag triall uirthi agus innis sí a cás di chun go leighisfeadh sé í, mar dubhradh leí gur óna leithéid go raibh leigheas le fáil. D'innis an bhean eile a sgeul féin annsan ach d'iarr sí uirthi gan aon nídh a rádh mar gheall air go dtí go mbeadh sí féin is a fear marbh.
   Seo mar d'innis sí: "Bhíos annso", ar sí,"agus bhí Cáirdeas Críost liom ar an mbaile agus ní raibh aon lá ná tagadh sé isteach is dearguíodh sé a phíp is tugadh sé an phíp le nól dom. Lá tháinig m'fhear féin isteach is mé ag ól na pípe uaidh. Níor dhein sé ach deúnamh ar thuaigh a bhí ann is do bhuail sé an Cáirdeas Críost is do mhairbh sé é. Tá sé curtha annso fé lic a' tínteáin is níl fhios ag aoinne dá mhaireann cá bhfuil sé. Is mo mo thrióbloid-se féin ná do thrioblóid-sé, cé ná measann aoinne gur mar sin atá.

   

   Tras-scríofa ag duine dár meitheal tras-scríbhneoirí deonacha.

   Stair Athraigh

   Topaicí

   1. seánra
      1. creidiúint (~391)
         1. creidiúint choiteann (~2,535)
   2. gníomhaíochtaí
      1. cleachtas an leighis
         1. leigheas dúchasach (~11,815)

   Teanga

   Gaeilge

   Bailitheoir

   Seósamh O Drisceóil

   Inscne

   Fireann

   Seoladh

   Cnocán na mBairneach, Co. Chorcaí

   Faisnéiseoir

   Finghinn O Drisceoil

   Inscne

   Fireann

   Seoladh

   Cnocán na mBairneach, Co. Chorcaí